Eurovision milli seçiminin sonuncu yarımfinalçısı məlum oldu

30 Ocak 2012, 10:05 Günay Eltürk

Bu Arzu İsmayılovadır

"Eurovision" Mahnı Müsabiqəsi 2012-də Azərbaycan təmsilçisinin müəyyənləşməsi üçün keçirilən Milli Seçimlərin 8-ci həftəsi başa çatıb. Yanvarın 23-də İctimai Televiziyanın efirində start götürən Milli seçimlərin sonuncu həftəsinin qalibi səs çoxluğu ilə Arzu İsmayılova olub.

SMS və münsiflər heyətinin səsverməsi ilə həftənin 2-si Zaur Əmiraslanov, 3-sü Ülvi Rəşidov, 4-sü Ülkər Quliyeva, 5-si Rinat Alimov, 6-sı Əli Məmmədli, 7-si Abbas Kərimli, 8-si “Caspian Dremers” qrupu, 9-su Tofiq Hacıyev olub.

Sonuncu həftənin xüsusi qonağı qismində "Eurovision 2011"in qaliblərindən Eldar Qasımov çıxış edib. Eldar Qasımov Milli Seçimlərin iştirakçılarına uğurlar arzulayıb: “Biz Nigarla səhnədə öz istedadımızı göstərdik və bütün Avropa səmimiliyimizi duydu. Təmsilçimiz kim olursa, olsun, həmvətənlərimi onu dəstəkləməyə çağırıram. Azərbaycan bizim Vətənimizdir və biz hər bir zaman təmsilçimizi dəstəkləməliyik”.

Eldar Qasımov "Eurovision 2011"dən sonra ilk yeni mahnısını məhz Milli Seçimlərin sonuncu günündə tamaşaçılara təqdim edib. Sevgidən bəhs edən mahnı “Birlikdə nəhayət” adlanır. Mahnının bəstəkarı Aleksandr Kalanşikov, sözləri Zəhra Bədəlbəyli və Toniyə məxsusdur. Eldar Qasımovun yeni mahnısı Azərbaycan dilindədir.

Qeyd edək ki, artıq Milli Seçimlərin növbəti mərhələsi-yarımfinalın 8 iştirakçısı məlumdur. Bunlar Orxan Kərimli, Məryəm Sadıqova, Xəyyam Mustafazadə, Fəqan Səfərov, Elton İbrahimov, Adil Baxışlı, Səbinə Babayeva və Arzu İsmayılovadır. Qeyd olunan ifaçılar Milli Seçimlərin final mərhələsi uğrunda mübarizə aparacaq.

Xatırladaq ki, Milli Seçimlərin canlı efir həftəsinə ötən ilin noyabrın 28-də start verilib. Seçimlərdə səkkiz həftə ərzində 72 iştirakçı növbəti mərhələyə çıxmaq uğrunda mübarizə aparıb.

Bu haber 255 defa okunmuştur.