TÜRKİYƏ SƏFİRLİYİ: <ÖNÜMÜZDƏKİ GÜNLƏRDƏ AZƏRBAYCANIN DƏSTƏYİNİN DAVAM ETMƏSİNİ ARZULAYIRIQ>

26 Ocak 2012, 09:22 Anar Memmedli

Yanvarın 25-də Türkiyənin Azərbaycandakı səfirliyi Fransa Senatının "erməni soyqırımı"nı inkar edənlərin cəzalandırılmasını nəzərdə tutan qanun qəbul etməsi ilə bağlı bəyanat yayıb.

“Media forum” saytının məlumatına görə, bəyanatda deyilir ki, bu qanunun qəbul edilməsi ilə Fransada hər bir Türkiyə türkü, hər bir azərbaycanlı, qazax və qırğız, hər bir tədqiqatçı, fikir sahibi təhdid altına düşüb: “Azərbaycanın vəzifəli şəxslərinin və siyasətçilərinin də qeyd etdiyi kimi, Fransa rəhbərliyi regionda sülhün bərqərar edilməsi üçün yeritdiyi vasitəçilik missiyasını layiqincə yerinə yetirə bilməyəcəyini bir daha nümayiş etdirib. Əsasən Fransa hökumətinin öz səriştəsizliyini və tərəfgirliyini görüb öz istəyi ilə Minsk qrupundan uzaqlaşması ən yaxşı çıxış olacaq.

Yaddaşdan heç vaxt silinməyəcək 20 il əvvəl baş verən Xocalı faciəsinə - qətliamına göz yuman bəzi fransız idarəçilərin Birinci Dünya müharibəsi vaxtı, bir əsr əvvəl baş verən hadisələr barədə yalanları gündəmə gətirərək siyasi dividendlər əldə etməyə çalışması, dərin kökləri olan keçmişi və ənənələri ilə tanınan Fransanın siyasət qurumuna silinməz bir ləkə salıb.

Sözügedən qərar Türkiyə ilə Ermənistan, həmçinin Azərbaycanla Ermənistan arasındakı münasibətlərə mənfi təsir göstərəcək, xalqlar arasında kin, nifrət və düşmənçilik hisslərini gücləndirəcək. Eyni zamanda bu bölgədə gərginliyi artıracaq və xalqlar arasında etimadsızlığı daha da dərinləşdirəcək. Digər tərəfdən, son dövrdə bütün Avropada genişlənən ksenofobiya və irqçilik kimi tendensiyaları gücləndirəcək. Fransada yaşayan türklərlə ermənilər arasındakı ziddiyyətləri kəskinləşdirəcək, bu ölkədəki ictimai barışığa və əmin-amanlığa qətiyyən xidmət etməyəcək. Qısaca, Fransanın dəyərlərinə və Fransa xalqının mənafelərinə zidd olan, məhdud sayda siyasətçinin bəsit hesablarına və oyunlarına xidmət edəcək bu qanun xalqlar arasındakı münasibətlərə xələl gətirəcək.

Türkiyənin bu qeyri-legitimliyə qarşı mübarizəsində Azərbaycan xalqının və rəhbərliyinin verdiyi dəstək minnətdarlıqla qarşılanmaqdadır. Digər tərəfdən, mübarizəmiz hələ başa çatmayıb. Buna görə, önümüzdəki günlərdə Türkiyənin atacağı addımlara qardaş Azərbaycanın dəstəyinin davam etməsini arzulayırıq”.

Bəyanatda vurğulanır ki, Türkiyə Fransa senatının ümumbəşəri dəyərlərlə bir araya sığmayan haqsız qərarına qarşı hər cür legitim yollarla mübarizə aparmaqda qərarlıdır: “Sağlam fikirli Fransa xalqının və senatorlarının bu məsələdə davam edən dəstəyi isə ümidlərin sönməməsinə əsas verir. Fransada sağlam düşüncənin qalib gəlməsini səbirlə gözləyirik, məsələ Konstitusiya Məhkəməsinin müzakirəsinə veriləndə bu məhkəmədən ədalətli bir qərar qəbul etməsini umuruq”.

http://www.mediaforum.az/az/2012/01/25/T%C3%9CRK%C4%B0Y%C6%8F-S%C6%8FF%C4%B0RL%C4%B0Y%C4%B0-%C3%96N%C3%9CM%C3%9CZD%C6%8FK%C4%B0-G%C3%9CNL%C6%8FRD%C6%8F-AZ%C6%8FRBAYCANIN-023240754c00.html

Bu haber 64 defa okunmuştur.