Rauf Denktaşla vida mərasimi başlayıb

16 Ocak 2012, 13:51 Günay Eltürk

Şimali Kipr Türk Cümhuriyyətinin başçısı sabah dəfn ediləcək

Bir neçə gün əvvəl vəfat etmiş Şimali Kipr Türk Cümhuriyyətinin ilk prezidenti Rauf Denktaş bu gündən başlayaraq sabah davam edəcək mərasimlə dəfn ediləcək. Mərasim bu gün yerli vaxtla saat 10-da başlayıb və Rauf Denktaşın tabutu xəstəxanadan Cümhuriyyət başçısı sarayına nəql edilib. Bundan sonra sabah səhər saat 9-dək sarayda Rauf Denktaşla vidalaşmaq istəyənlərin növbəli keçidi olacaq. Daha sonra tabut Səlimiyyə məscidinə aparılacaq və cənazə namazından sonra Cümhuriyyət parkına aparılaraq orada dəfn ediləcək.

Rauf Denktaşın dəfn mərasimində Türkiyə prezidenti Abdullah Gül, baş naziri Rəcəb Tayyib Ərdoğan və xarici işlər naziri Əhməd Davudoğlunun və bir sıra dövlət məmurlarının iştirak edəcəyi gözlənilir.

Qeyd edək ki, Şimali Kipr Türk Cümhuriyyətinin başçısı Rauf Denktaşın ölümü ilə əlaqədar cümə gününədək dövlət bayraqları endirilib, hər növ əyləncəli proqram və tədbirlər təxirə salınıb. Təcili tibbi xidmət istisna olmaqla, dövlət müəssisələrində tətil elan edilib

Bu haber 449 defa okunmuştur.