Küveytdəki diasporumuz yeni layihələr həyata keçirməyi planlaşdırır

12 Ocak 2012, 15:57 Anar Memmedli

Könül Hacızadə: "Fransa parlamenti 'erməni soyqırım' ilə bağlı qəbul etdiyi qərarı geri götürməsə, etirazlarımızı daha da geniş şəkildə davam etdirəcəyik"

Küveytdə fəaliyyət göstərən “VətənSevər” Azərbaycan-Küveyt Mədəniyyət və Dostluq Cəmiyyəti və Azərbaycan Respublikasının bu ölkədəki səfirliyi tərəfindən Dünya Azərbaycanlılarının Həmrəylik gününə həsr olunmuş tədbir keçirib.

“VətənSevər”in sədri Könül Hacızadənin qəzetimizə bildirdiyinə görə, bayram mərasimində Küveytdə yaşayan azərbaycanlılar, türklər, eləcə də yerli ictimaiyyət nümayəndələri iştirak ediblər. İlk öncə tədbirdə Azərbaycan Prezidenti İlham Əliyevin Dünya Azərbaycanlılarına müraciəti oxunub. Sonra Azərbaycan səfiri və Könül Hacızadə çıxış edərək 31 dekabr - Dünya Azərbaycanlılarının Həmrəylik gününün tarixi, bu günün dünyanın müxtəlif ölkələrində yaşayan azərbaycanlıların azərbaycançılıq məfkurəsi ətrafında daha sıx birləşməsinə xidməti barədə məlumat veriblər. Tədbir zamanı həmçinin “VətənSevər”in yeni yaradılmış www.vetensever-kuwait.com saytının təqdimatı olub. K.Hacızadə dedi ki, bu sayt vasitəsilə, Ermənistanın Azərbaycana təcavüzü , xalqımızın mədəniyyəti, mətbəxi, adət-ənənələriKüveyt ictimaiyyətinə yaxında çatdıracaqlar: “Düşünürəm ki, sayt gələcəkdə Küveytdə ölkəmiz haqqında informasiya bazası rolunu oynaya bilər”.

Diaspor rəhbəri “VətənSevər”in bir il fəaliyyət göstərməsinə baxmayaraq, Küveytdə ölkəmizin tanınması istiqamətində xeyli işlər gördüyünü və qarşıda cəmiyyət tərəfindən bir neçə layihələri həyata keçirməyi planlaşdırıldığını qeyd etdi: “Biz diaspor nümayəndələri daha da fəal olmalıyıq”.

Tədbirin rəsmi hissəsindən sonra 31 dekabr - Dünya Azərbaycanlılarının Həmrəylik günü və Yeni 2012-ci ilin gəlişi münasibətilə ziyafət verilib.

Yeri gəlmişkən, “VətənSevər” də Fransa parlamentinin “erməni soyqırımı” ilə bağlı çıxardığı qərara öz etirazını bildirib. K.Hacızadənin sözlərinə görə, Fransa parlamentinin bu qərarı bütün diaspor təşkilatlarımızın vahid mövqedən çıxış etməsini şərtləndirir: “Bununla əlaqədar olaraq bu yaxınlarda cəmiyyətimizin üzvləri başda olmaqla, Türkiyə türkləri və Küveyt vətəndaşlarının imzası ilə Fransa parlamentinin qərarına qarşı yazılı bir imza toplayaraq öz etirazımızı bəyan etmişik”.

Cəmiyyət sədri onu da əlavə etdi ki, Fransa parlamenti bu qərarı geri götürməsə, etirazlarını daha da geniş şəkildə davam etdirəcəklər: “İmza toplama kampaniyamızın əsas məqsədi odur ki, Fransa parlamenti Ermənistanın Qarabağ və Xocalıda törətdiyi soyqırıma diqqət ayırmaqdansa, orada yaşanan insanlıq faciəsinə göz yumur. Olmayan tarixi hadisəni qanunlaşdırıb, insan hüquqlarını kobud şəkildə pozmaqla məşğuldur”.

K.Hacızadə Fransa hökuməti və parlamenti bu gülünc qərarını geri götürməsə, dünyadakı Azərbaycan diasporunun da kəskin bir şəkildə hücuma keçəcəyinə inandığını vurğuladı.

FUAD
http://www.paritet.az/diaspor/4599.html

Bu haber 287 defa okunmuştur.